آیدین بیر عائیله‌نین ائولادی اولان، سئویل اقدسی اؤز عاییله‌سی‌نین تشویق‌لری نتتجه‌سینده موسیقی دونیاسیندا ایلک آددیملارینی آتماغا باشلاییر. بو آددیملار اورگ (سینتیزاتور Sintezatorlar) و پیانو مشق‌لری‌ایله باشلانیر. ۱۳۷۴ـ جی ایلده تهراندان سئویل اؤز عائیله‌سی‌ایله تهراندان تبریزه کؤچور. سئویل‌ین آتاسی‌نین مهندس‌لیک شیرکتی‌نین ایش آلانی تبریز و اورمیه‌ایدی. او زامانلار تبریزده موسیقی مکتبلری بوگونکو قدر چوخ دئیردی. بوردا آتاسی‌نین اوستاد محمود شاطریان‌ایله دوستلوغو سئویل‌ین دادینه چاتیر. سئویل باجی‌سی سونای‌ایله اوستاد شاطریانین مکتبینده جیددی موسیقی تعلیمی آلماغا باشلاییر. بو یولون یولچولوغو هله سئویل ایلک تحصیل ایلینده اولارکن باشلادی. سونای اوندا اوشاق باغچاسینا گئدیردی. بو ایکی باجی‌یا، موسیقی مکتبی یولوندا، تحصیل مکتبی یولوندا اولدوغو کیمی، یولداشلیق ائدن، اونلارین آنالاری‌ایدی. موسیقی مکتبی هفته‌ده بیرگون ایدی. بو ایللرده سئویل‌ین اورگ (سینتیزاتور) معلیمی و سونای‌ییین اکاردئونی معلیمی اوستاد نجفی ایدی.
آتا آنا حیمایه‌سه‌سینه دایانان ایکی باجی‌نین موسیقی حئکایه‌سی سونرا ناغارا اوستاد صمد نیک نفس‌ین اؤیرنجی‌سی اولماقلا دوام ائدیر. سئویل اؤز خاطیره‌لرینده دئیر کی: "بوتون بو دؤر عرضینده آتا و آنام بیر یاندان بیزی تشویق ائدیردیلر و بیریاندان هر بیر زحمته دؤزوب و هر بیر چتین‌لی‌یه سینه گلیردیلر. من بو دؤورون هر بیر گونو و بیر آنی اوچون، اونلارا بورجلی و مینتدارام. من فخرله اونلارین هر ایکی‌سی‌نین ده اللریندن اؤپوب اونلارا جان ساغلیقی و اوزون عؤمور آرزولاییرام. قیشین سویوق واختی و یایبن ایستی لرینده، آخشاملار بیزلری موسیقی مکتبی‌نه آپاریب ساعاتلارلا بیزیم مشقلرین قورتارماسینی بکله‌ییردیلر. ائوه قاییدارکن ده، یول بویونجا آتا آنا محبتی و ائولاد سئوگیسی آتموسفری بورویوردی. ایش بونونلا بیتمیردی. ایکی انرژی‌لی و طلبکار قیزجیغاز، معلیملرین تاپشیریقلارینی نئجه دئیرلر، آرتیقلاماسیلا یئرینه یئتیرمه‌لی‌ایدلر و ساعاتلارلا قیزلاری‌نین قوللوغوندا اولموش یورقون والدین، ائوده قیزلاری‌نین آئودیتوریاسیندا، اونلارین ایفالارینی، اونلار دفعه دینله‌مه‌لی‌ایدیلر. بو آرادا بلکه یورقون آتا آنانین دادینه قونوشولاریمیز چاتیردیلار. ایش بوردا ایدی کی، قونشولار راحاتسیز اولماسینلار دئیه، مشق ساعاتلاریمیز ناهاردان سونرا ساعات ۵ـ۷ آراسینا محدود اولموشدو.
آتا آنامیزا صبرین توکمنزایدی آمما ایللر تئز کچدی. واخت گلدی کی من تار چالماغا باشلادیم. حئکایه‌میزین بو بؤلومو بئله باشلادی: آتام هفته ده بیر گون بوش واختی اولاندا محمود آقا شاطریانین موسیقی مکتبی‌نه گئدردی و دوست اولدوغو اوچون بیر ایکی ساعات چایلاشیب و صحبتله‌شردیلر. آتام تاری چوخ سئوریردی، بیر گون محمود آقا یا دییرکی، آی قارداش بو تاری منه ده اوُیرت من ده بوش واخت لاریمدا تمرین ائدیم و چالیم! محمود آقا رحمتلییق گولور و آتاما دییرکی، سنین بو قدر مشقله بیر گون بوردا صاباح اورمیه ده هئچ چالماغا و تمرینه واختین اولار کی؟ من تاری سئویله اوُیره دیم او چالار سیزده ائوده قولاخ آسیب ذؤوق آلارسیز. واوجورده اولدو صاباحی‌سی گون من محمود آقا ایله تارا باشلادیم و هر دفعه سئوه ـ سئوه مشق ائدیردیم، ائوده آذربایجان موسیقی‌سی چوخ قولاغیما دیمیشدی و اونا گوره ده آز زاماندا بیر نئچه هاوا چالا بیلدیم، محمود آقا منی چوخ تشویق ائدیردی و حوصله‌ایله درسینه دوام ائدیردی. البته دئمه‌لی‌یم کی، اوستاد شاطریان ایشینده جیددی و اؤیرنجی‌لرینه قارشی طلبکار بیر معلمی ایدی، اوندا اولان بیلگی و حوصله و صبری چوخ آز گوُرموشم، تأسسوفلر اولسون کی، بیر ایل سونرا، او وفات ائتدی، من ده داها تار چالماغی تعطیل ائتدیم، داها دوغروسو موسیقی‌یه هوسیم آزالدی. اوستادین اوُلومو منی چوخ کدرلندیردی. بوردا دا، آتام و آنام یولومون دوام ائتمه‌سینه و باشلانمیش رشته‌نین قیریلماماسینا یاردیمچی اولدولار. اونلار منه دئدیلر: "سن تار مشقلریوی دوام ائتمکله، تار چالماقلا اوستادیوین روحون داهادا شاد ایلرسن، چون او مرحوم ایستیردی سن تاری اؤیرنیب چالاسان." من نئچه آی سونرا اوستاد شاطریانین موسیقی مکتبی‌نه گئری دؤندوم. یئنی اوستادیم دا چوخ قریبه دئیردی. او، آقای شاطریانین بویوک اوغلو اوستاد آیدین شاطریان‌ایدی."
سئویل‌ین تار مشقلری سونرالار اوستاد سونار، اوستاد شهریار صدیق‌له دوام ائدیر. بو ایللر تبریزده موسیقی مکتبلری‌نین گلیشمه‌سی دؤورونه تصادوف ائدیر. سئویل بوتون بو ایللر بویونجا آلدیقی درسلر و قاتیلدیغی مشقلرده، اؤز اوستادلاریندان علاوه یوزلرله موسیقی اؤیرنجی‌سی‌نه ده یول یولداشلیغی ائدیر.
سئویل‌ین بوتون بو ایللرده تحصیلی‌نی ده اوغورلا دوام ائتدیریر و اورتا مکتبی بیتیردیکدن سونرا، اونیورسیتت‌ده عمران مهندس‌لیگی اوخویور. سئویل بوگون خاطیرلاییر کی او ایللرده بیر ساعات مهندس‌لیگ درسلری اوخودوغو قارشی‌سیندا، ایکی ساعات تار مشق ائدیرمیش. اؤزونو مهندس کیمی تصوور ائده بیلمه‌ین سئویل، رسمی دؤولت تحصیل سیستم‌ینده مؤوجود اولان ایکی ایل‌لیک موسیقی تحصیلی آلیر آمما لیسانس آلماق اوچون ایکینجی ایکی ایل‌لیک دؤور، کرونا پاندمی‌سی دؤرونه تصادف ائدیر و بو ایللری اونلاین رئژیمده دوام ائتمه‌لی اولور.
سئویل‌ین موسقی معلیمی کیمی فعالیتی بوندان سونرا باشلاییر. سئویل بو دؤورده "هنرستان هنر و موسیقی کوثر ده"، "آموزشگاه موسیقی آوای شهریار"، "آموزشگاه موسیقی ققنوس"، "آموزشگاه هنری پلاتو رضوی" کیمی موسیقی مکتبلرینده موسیقی معلیمی کیمی یوزلرله موسیقی اؤیرنجی‌سی‌نین یئتیشمه‌سینده پای صاحیبی اولور. سئویل بو مکتبلرده سککیز یاشدان آلتمیش یاش آراسیندا اؤیرنجی‌لره و بو کلاسلاردا قیزلی ـ اوغلانلی و قادینلی ـ کیشی‌لی، اؤیرنجی‌لره تار درسی کئچیر. سئویل هم اؤیردیر و هم اؤزو بیر گنج معلیم کیمی، تجروبه قازانیر. پاندمی دؤرونده حیاتین بیر چوخ بؤلومو مجازی دونیایا داشینیر و بو نلاردان بیر چوخو، پاندمی‌دن سونرا دا، مجازی دونیادا قالماغا دوام ائدیر. بو مجازی عالم سئویل‌ین معلیم‌لیک ایشینده اونا یئنی مئیدانلار آچیر. بیردن بیره، سئویل یوزلر و مینلر کیلومتر اوزاقلاردا تورکیه‌ده و حتی کانادا دا یاشایان اؤیرنجی‌لرین اوستادی اولور.
سونرالار، سئویل تبریزده قادین صنعتکارلاردان عیبارت بیر نئچه موسیقی قوروپلاری یارادیر. بوتون ایراندا اولدوغو کیمی، گونئی آذربایجاندا دا، کنسرت‌لر قارشی‌سیندا اولان قانونی و غیرقانونی مانعه‌لر یوموشالدیقدان سونرا، سئویل و اونون رهبرلیک ائتدی‌یی آنسامبل ۱۳۸۹ ـ ۱۳۹۹ آراسیندا تبریز، اردبیل، خوی، اورمیه و تهراندا کنسرت‌لر وئرمه‌یه موفق اولورلار. سئویل‌ین یارادیجی‌لیق یولو موسیقی فستیوال‌لاریندان دا کئچیر و او جومله‌دن ۱۳۹۷ ده کئچیریلن "جوان" موسیقی فستیوالیندا، اوچونجو یئره لاییق گؤرونور.
سئویل‌ین اینستاگرام و یوتیوب کانال‌لاری‌نین آدرسلری:
instagram:@sevil.aghdasi
You tube: Sevil aghdasi