Tribun Logo

جنوبی آذربایجان قلم انجمنی (ایران) سلمان رشدی یه قارشی آپاریلان وحشیجه سینه سوقصدی قیناماغا چاغیریرSalman Rushdi

جنوبی آذربایجان قلم انجمنی (ایران)

شیطان آیه لری» کتابی نین یازاری آدلیم یازیچی سلمان رشدی، اوت آیی نین اون« ایکینجی سینده (21 مرداد) اصلیتی لبنانلی مسلمان بیر آمریکا وطنداشی واسیطه سیله آغیر یارالاندی.

بو سوقصد، آردی کسیلمه ین باشقا ترورلارین دوامی ساییلیر.

کئچنلرده ده، مختلف اؤلکه لرده بو کتابی نشر و ترجمه ائده نلرده ن بیر نئچه سی، بئله ترور و سالدیریلارا قوربان گئتمیشدیلر.

بوتون بو ترورلار و جنایتلر اسلام جمهوریسی نین وفات ائتمیش اولان رهبری خمینی نین باشی آلتیندا و اونون فتواسی نین نتیجه سی دیر.

اسلام جمهوری سینین چیرکین حیاتی نین تاریخی، مینلر و مینلر انسانین او جمله ده ن اونلار یازیچی و ژورنالیست ین قانی ایله یازیلمیشدی. بو رژیم قیرخ دورت ایل عرضینده غیر فارس ملتلره منسوب اولان بیر چوخ انسانین و یا خود یوزلر شیعه اولمایان باشقا دین منسوبلارینین قانینی آخیتمیشدی.

خمینی، سلمان رشدی یه قارشی اعلان ائتدییی فتواسی ایله، اسلام جمهوریسی نین ترور و باسقی آپاراتینی، باشقا اؤلکه لرین وطنداشلارینا قارشی دا یؤنتمیشدی.

اصلینده خمینی بو فتوا ایله بیر ترور و جنایت پاندورا قوطی سینی آچمیشدی کی، ننیجه سینده نئچه نئچه یازیچی و ژورنالیست، فاناتیک مسلمانلارین ترورلارینا قوربان گئتمیشدیلر.

میلادی 1993- ینجی ایلده تورکیه جمهوریت ینده شیطان آیه لری کتابی نین مترجمی عزیز نسین ایله بیرلیکده اولانلارا قارشی حیاتا کئچیریلن سوقصد و تروردا 30 نفرین اؤلدورولمه سی، ایراندا «زنخیره ای قتل لر» آدلانان ترورلاردا اؤلدورولن یازیچی و مترجملر، ژاپون اؤلکه سینده شیطان آیه لری کتابی نین مترجمی نین قتله یئتیریلمه سی و هابئله فرانسادا شارلی ابدو ژورنالینا قارشی آپاریلان باسقیندا اؤلدورولن ژورنالیستلر، هامیسی بو فتوانین قوربانلاری ساییلیرلار.  

سلمان رشدی یه سوقصد ائده ن لبنانلی - آمریکالی هادی مطر، لبنان دا فعالیت گؤسته ره ن «حزب الله» تشکیلاتینا منسوب دی.

بو تشکیلاتی یارادان و اول گونده ن اونلارا مادی و لجستیک یاردیم ائده ن و بوتون گوج ایله بو تشکیلاتین آرخاسیندان دوران، اسلام جمهوری سی دی.

دئمه لیییک کی، اسلام جمهوریسی دفعه لرله حزب الله ین الی ایله بو رژیمه قارشی چیخانلاری آرادان گؤتورموشدور.

برلین شهرینده میکونوس رستوران یندا ایران کوردلرینه منسوب دموکرات پارتی سینین رهبرلرینه قارشی سوقصدی، اسلامی رژیم بو تشکیلانین الی ایله حیاتا کئچیرمیشدی.

دوغردور کی، خمینی نین فتواسیندان سونرا اسلامیست قووه لر هر بیر فرصت ده سؤز و قلم آزادلیغینا قارشی اللرینده ن گله نی اسیرگه مه میش و بوتون بو ایللرده اسلام جمهوری سینین تام حمایه سینی قازانمیشلار، لاکن دیگر طرفده ن سلمان رشدی نین یانچیلاری بوتون اؤلکه لرده، او جمله ده ن اسلام رژیمی نین باسقی سی آلتیندا اینله ین ایران اؤلکه سینده هر گون بیر آزدا چوخالمیشدیلار.

سلمان رشدی یه قارشی سوقصد تکجه بیر انسانا قارشی آپاریلان چیرکین بیر عمل دئییل، اصلینده سؤز و قلم آزادلیغینا قارشی آپاریلان وحشیجه سینه بیر آکت ساییلیر.

جنوبی آذربایجان قلم انجمنی اؤزونو دموکرات آدلاندیران هر کسی سلمان رشدی یه قارشی آپاریلان وحشیجه سینه سوقصدی قیناماغا چاغیریر.

اؤزلرینی دموکرات آدلاندیران اؤلکه لر، یازیچیلارا و ژورنالیستلره دیوان توتان ایران اسلام جمهوریسینه قارشی ایکی اوزلو سیاست لرینه سون قویمالیدیلار.

هئچ کیمسه نین - هر باهانا ایله اولورسا، اولسون - سؤز و قلم آزادلیغینا قاداغا قویماسینا اذن وئرمه مه لیییک!...

جنوبی آذربایجان قلم انجمنی سلمان رشدی نین یانیندا دی.

جنوبی آذربایجان قلم انجمنی (ایران)

23 اوت 2022 ( 1 شهریور)

مطالب مرتبط