مبارزه جاري

سئچکی‌لرین تحریمین‌دن سؤز گئدنده، کیملر داها اورکدن تحریم ائتملی‌دیرلر، دوشونورسونوز؟! من‌دن سوروشساز، دئیردیم تورکلر!
چونکو ج‌ا طرفیندن داها چوخ ظولم و تبعیضه معروض قالانلار ایچینده تورکلر ایلک سیرادادیرلار. آیریجا، بوندان اؤنجه‌کی سئچکیلرده وئریلن وعد‌لر، هئچ بیریسی دئمک اولار‌ کی، یئرینه گئتمه‌ییب. عمومی اولان ایستیبداد، فساد و تروریسم کیمی موشکوللر بیر یانا، اؤزللیکله تورکلره مخصوص اولان یوخسوللوق، مهاجیرت، سرکوب کیمی موشکوللره باخساق، عادی بیر ایران تورکو نییه گرک سس وئرسین!؟
اؤزللیکله مجلیس سئچکیلرینده، کی اونون اختیاراتی و سئچیم پروسه‌سی هر بیر عاغیللی و شریف اینسانا ایهانت‌‌دیر.
عادی اینسانلاریمیزی قیناساقدا- اؤز آرامیزدی- بعضی سببلردن دولایی، اولدن ده بیر او قدر گؤزلنتیمیز یوخدو. آنجاق تورک میللی فعاللار نئجه؟! داها اونلارا، طایفابازلیق، هم‌کندلی‌بازلیق، جووه دوشمک، احسان یئمک کیمی بیر سببلر سایماق اولماز کی. دوزدور؟!
زامانیندا، سئچکیلرده فضا آچیلیر دئیه، آکتیو اولوب او فضادان قوللاناق، دئییردیک. آمما، ایندی ده بونا احتیاج وار، سیزجه؟! میللی حرکتین دیرلری بو قدر یایغین اولدوغو بیر زاماندا، اؤزللیکله سوسیال مئدیالارین مسلط اولدوغو بیر دؤنم‌ده بو ایش نه قدر لازیم‌دی، سیزجه؟!
اؤزللیکله، سون اولایلاردان سونرا، یعنی آبان و دی آیلارینین قیرغینین‌دان و هابئله اوچاغی ووروب سالاندان سونرا، بئله بیر سیستمین سئچکیلرینده آکتیو اولماغین، جاذیبه‌سی چوخدور یا دافیعه‌سی؟!
یعنی میللی حرکتین سسینی ایندییه‌جن ائشیتمه‌ین بیری ویا خود ائشیدیب قبول ائله‌مه‌ین بیری، بو وضعیتده میللی فعالارین انتخاباتدا فعالیتی نتیجه‌سینده، میللی حرکته مثبت باخیش تاپاجاق یوخسا منفی؟!
اونوتمایاق کی، وضعیت او قدر خارابدی کی، حتی ایصلاح‌طلبلر ده بو سئچکلیر باره‌ده تحریمه-بنزر موضع توتموشلار.
بلکی، دئیه‌جکسینیز کی، باتی آذربایجان فرق ائله‌ییر، چونکو اوردا کورد مسئله‌سی و ارضی ایدیعالار وار.
بونون بحثی باشقا‌دیر و اؤزونه مخصوص دیرلندیرمه ایسته‌ییر! آنجاق، باتی آذربایجانی بیر کنارا قویساق، باشقا شهرلرده نئجه؟ مثلا مشکین‌ده!؟ اورادا اولان اهالی‌نین هامیسی تورکدو کی!
یاخشی خاطیرلاییرام کی، کئچنلرده سئچکیلرده آکتیو اولماق، بیر آدایین دالینا دوشوب اونا میدان سولاماق آنلامیندا دئییلدی. میللی فعاللارین اؤزلریندن بیری آدای ا‌ولمادیغی زامان، اونلار سادجه میتینگلره (فرق ائلمزدی کیمین میتینگی‌دی) قاتیلیب، اؤز سؤزلرینی دئیه‌ردیلر.
البته بو ایش، تانینمیش میللی فعاللار طرفیندن یوخ، داها چوخ او زامانین گنجلری طرفیندن چوخ جسارتله حایاتا کئچیریلیردی. چونکو اینانیردیق، تانیمیش و سابیقه‌لی فعاللارین قاتیلماسی، میللی حرکته بوتونلوکده یونگوللوک گتیرردی. استراتژی اولاراق، میللی حرکت، خالق ایچینده اؤزونه مخصوص لاییق‌ و کاریزماتیک بیر اوپوزیسیون جایگاهی قازانما‌لی ایدی. خالقی ناقص‌العقل یئرینه قویاراق، شورای نیگهبان‌ طرفیندن سئچیلن ایکی اوچ معلوم الحال کیمدیلر کی!؟ هئچ بیر ایشه یارامایان، فساد و اوغرولار ییغینجاغینا دؤنوشن بیر مجلیسین ایکی هفته‌لیک سئچکیلرینه گؤره، آغیر هزینه‌لرله توپلانان سیاسی دوشونجه‌نین اعتباری‌نی اورتالیغا آتا بیلمزدیک. باشقا سؤزله دئسک، میللی حرکتین اعMeshginتباری آدینا، دمکراسی و اینسان حاقلاری و البته میللی وارلیغیمیز اوغروندا اوزون ایللر فعالیت ائدیب، حبس چکنلریمیزین یئری، اعتبار و احترامی قورونمالی‌ایدی.
ایندی تکرار قاییداق چکدیییم مشکین میثالینا! بو شهر، جمعیتینین آز اولماسینا رغمن، اؤیرنجی‌ ساییسی هر زامان چوخ و میللی موجادیله‌ده اؤزونه مخصوص یئری اولوب. دئمک اولار، هر ساحه‌ده اورتایاقویموش شخصیتلری اولوب. ایندی مشکین کیمی بیر شهریمیزده، بوراخین عادی خالقی، بوراخین گنج فعاللاری، تانینمیش فعاللارین بیر تعدادی بئله، او نامزدین- بو نامزدین تبلیغاتچی‌سی اولوبلار!
هاردان هارایا؟! بو قدر پیس دوروما دوشموشوک، یعنی؟!
دوشوننده کی، بو فعاللارین هر بیریسینی، مجلیس نوماینده‌سی کی سهلدی، وزیر یئرینده گؤروردوک، گؤرونن تابلو چوخ اوزوجو اولور.
کاشکی، ائله تابلونون اوزوجولویو بوقدرده قالسایدی! وضعیت بوندان داها دا برباددی.
او نامزدلرین بیری( آقای محمود عباسزاده مشکینی) آوروپا بیرلییی طرفیندن تحریم لیستینده‌‌دی. نه‌یه گؤره؟!
همن بو تانینمیش فعاللاری آسیب- کسمک، ایشکنجه ائلمک، حزب قورماقلارینی انگلله‌مک، تجمع‌ مجوزی وئرمه‌مک، آغیر حکم کسمک‌ده مسئولیت داشیدیغینا گؤره.
اینانا بیلیرسیز؟!


بو شخص، سازمان ملل‌‌-ه گلیب ایرانین سیاستینی او جومله‌دن تورکلره اولان تبعیضی توجیه ائله‌ین شخص‌لردن بیری‌دیر.
حتما بیلیرسینیز کی، خاریجی ایشلر باخانی، ظریف هر یئرده اوتوروب دئییر کی،”اگر میللت جمهوری ایسلامی‌‌نی ایسته‌میرسه، بس نئجه اولور کی، یوزده یئتمیش‌دن آرتیق سئچکیلره قاتیلیرلار”.
ایندی تصور ائله‌یین کی، عباسزاده تحریم اولماسایدی و هر زامان اولدوغو کیمی گلیب سازمان ملل‌ده منیم کیمی بیرینین ایددیعاسینا بئله جواب وئره‌جکدی؛
ایددیعا:”جمهوری ایسلامی تورک فعاللاری، او جمله‌دن آقای فلانی و بهمانی‌نی، سادجه اؤز حاقلارینی ایسته‌دیکلری اوچون، توتوقلاییب، شیکنجه ائدیب و ناصالح بیر محکمه‌ده بو قدر حبسه محکوم ائدیب و بو شراییط‌ده زیندان چکدیریب. بو‌ اینسان حاقلارینی پوزماقدی”
جواب (هر زامان جاسوسلوق یا پانتورکیسم اولوردو اما بو سفر):”بو سایدیغینیز شخصلره، بیز بئله ائله‌میشیک‌سه، بس نئجه اولور کی، فلانی منیم پیش-سخنرانیم اولور، بهمانی کاغیذ یاپیشدیرانیم.”
گولونجدو، هه؟!
یوخ، گولونج دئییل. نه اولدوغونو دئمک ایسته‌میرم!
فقط بونو دئییم کی، موجادیله‌میز آدینا، قازادیغیمیز آد و جایگاهین اعتبارینی قورمالی‌ییق.
سون